關於我們

毋忘初心，我嘅初心就係吃喝玩樂，經常使用#吃喝玩樂係我人生主修科，呢科真係修一世，至死方休，一直修讀冇中斷冇怠懶，今時今日都仲好勤力廢寢忘餐做功課，真金白銀呢度食嗰度食，要排隊咩，排！難訂枱咩，提早一年訂囉！要托人先至買得到咩？𠼮契爺我都制，為食人都係以結果為目標㗎⋯⋯

鍾意食嘢嘅人就鍾意分享，踏破鐵鞋覓食天下，然後發現飲食世界太大，上餐廳食大餐定買小食返屋企，美食地圖就好似尋寶地圖，發掘到好嘢就好似搵到寶藏一樣，開心到雙腳向後跳起拍手掌，起勢叫人去幫襯，係咁買返香港送畀人，買嘢食請人食好多時係野人獻曝，但係我樂此不疲，試過喺台灣買手信返香港行李超重一倍，罰左成張機票，肉赤之餘就興起不如自己開檔做生意賣嘢食，咁咪唔使又擔又抬。講咗十年，發現初心未變，今日實現夢想，感謝你們對我的信任！